سماسرة الفرشة تفرشو بينهم بنت فنان وواحد يدعي أنه شقيق جنرال وآخرون وفلوس صحيحة خرجات.

كتبحث الفرقة الوطنية هاد ليام معا شي وحدين تورطو في داك شي تاع التشهير، اللي تيخرج من يوتبرز وفيسبوكيين مغاربة عايشين في المهجر، ضمنهم المدعو الفرشة، وفرشات القضية شي وحدين تبين أنهم على علاقة بيه، وأنهم توسطو أيضا، باش خداو فلوس من ضحايا وصيفطوها للفرشة، عن طريق حساب بنكي محلي يملكه مغربي آخر مقيم بكندا، وغيرها من طرق تحويل الأموال.
وعلاقة بالموضوع تاع الفرشة، أمر وكيل الملك تاع المحكمة الزجرية عين السبع، الأسبوع الماضي، بتعميق البحث معا شي وحدين متورطين كذالك بتوصيل الأخبار المغلوطة والفاضحة للتشهير بالناس، وبينهم بنت فنان، وواحد الشخص من خريبكة تيدعي أنه شقيق جنرال، ومعروف بهاد الوصف، وكلفات النيابة العامة الفرقة الوطنية باش تبحث معاهم، حيث الفرقة هي نيت لي سبق ليها بحثات معا شي وحدين آخرين ضمنهم واحد من جديدة.
وحصلات الجريدة على معلومات تتخص طريقة تحويل الأموال للفرشة، وقال المتهم اللي مشدود دابا فعكاشة، بلي هو مكلف بجمع الفلوس من عند ناس تيرسلو الفرشة ليهم، باش ميبقاش يكتب عليهم ويفضحهم، وضمنهم شقيق بارون مخدرات طلب منو 25 مليون، وهي القضية اللي تشد فيها متلبس بتسلم مبلغ مالي لحساب الفرشة.
واعترف المتهم بلي سبق ليه شد الفلوس بعد ما اتصل بيه الفرشة فواتساب، وحدد ليه المكان اللي غيتلاقى فيه مع اللي غيعطيه الفلوس، وقال بلي كاين شي وحدين متيعرفهمش، هو غير تينفذ اللي طلب منو الفرشة، وياخذ الفلوس ويحطها فكونط تاع واحد المغربي فكندا، عندو حساب فالمغرب، وتاهوا صاحب الفرشة.
وذكر المتهم المبالغ اللي خذا من عند الناس، شي عطاه 5 مليون شي 10 شي جوج دالمليون.
دابا القضية مبقاش فيها غير التشهير والابتزاز، بل ولى فيها حتى غسل الأموال، حيث الفلوس اللي تتجي من جرائم النصب والابتزاز، هي أوطوماتيكيا عمليات ديال تبييض الأموال.
وكيل الملك حيد الباصبورات للمشكوك فيهم، ومازال البحث جاري معاهم، والأدلة اللي تتورطهم كثيرة والضحايا كثار حتى هما.