أسرار بريس…بقلم الزجال علي الگمري الروداني…
تصَّااااب
كل الحلوة يا المش ولاطيح فيها عرض
لا تسبقنا للكانون لا طمع فينا غرض
لاتجيب لفعة تقلب فينا فين تعض
لا تكن مطفل حنش و تعطينا بالفرض
تصَّااااب
كاع لي جا و نجا من فوق شي صرب
باغي يبدا يتعلم فينا جدول الضرب
حاسبنا غير عشة داير بيها الكصب
المرا فيناعايدة خنشة و حزامها قنب
والراجل بينامكلوم بالحفا يجري ويقلب
تصَّااااب
هكذا لقاوها طايبة بالفران والحطب
وهكذا نشروها كي الحريرة فوق الزرب
لي جا زاير ماتعرفو يفرح ولا يغضب
ليك الله يا حابا يانور الصبابة فالقلب
تصَّااااب
اللمة ماشي العصا فالرويضة والحرب
والخدمة ماشي بكثرة الجهالة والزرب
راه الكلمة شجرة الى رويتيها ترطب
والساكية عامرة لي صفيتيها تشرب
تصَّااااب
صبح الصباح وبدات كل جميعة تكتب
ها الحاضرة عالمة ولي خانها ينذب
ها البطانة قربات الشمس عليها تغرب
ها ريحتها عطات من السطيحة للدرب
ها الخنيشة نعمة الى جحتيها تهرب
ها و ها و ها تصَّااااب
الخيل بلا مقدم زعيم يهز علامو
وبلا خيال محزم فهيم يشد لجامو
كايعثرو غير الخيال وظلو قدامو
كلما زلق الزلقات يصفقو ليه ازلامو
تصَّااااب
كِالخطيب ناقصاه الحكمة فكلامو
الى فتى فالدين خلط حلالو بحرامو بحر زرك مالح ماه ومسوس طعامو آمصاب يسد غير فمو ويلزم حكامو
تصَّااااب
كانو بينا ناس خسام كايشطّحو القرودا
كاينيشوا بالنيشان وراه اليوما فالروضة
ماقديتي عالجماعة نوض جمع النوضة
تاقا الله فنا و فراسك لا دير الفوضى
تصَّااااب
كاع لي تعنى بالجهد الجهد الا جهد الله
وكع لِيحصل وطاح يجي عل عين كفاه
بغاو يحوزو فالمش غيرحشمو من مولاه
الراجل يقول هاأنا وشماتة يقول كان باه
تصَّااااب
كل الحلوة يا المش
