قهوة المساء مع الكاتبة (س ـ ح ).
المعيور و الكلام الطايح ولا مباح فعصرنا … مصطلحات نابية ولات متداولة بينا بشكل عادي فالشارع فالمدرسة وحتى فالمنازل، وخا هاد المصطلحات معدلة وتنغيرو بعض حروفها وكيولي النطق ديالها فشكل ورنان ولوهلة كتضن أنها ماشي معيورة ولكن فالعمق باينة هاد المعيورة أش كاتعني.
ولينا فواحد السيبة لدرجة أنك تخرج للشارع ضروري تسمع الكلام النابي يقدر يكون بين الأصحاب في إطار الضحك الباسل أو إلى كان شي نقاش بين أدمغة فارغة لي كيتحول إلى عراك بكلام عامر بالمصطلحات الزنقاوية، أو ملي شي حد كيكون هارب بالنيفو ديالو والخصم ديالو مكيلقا أسلحة فدماغو باش يواجهو كيلجأ للسبان والهضرة الطايحة باش يشتت ليه أفكارو ويستافزو…. أو فقط شخص أصبح مريض بتخصار الهضرة وضريب الكلام والمعاني حتى ولا عندو عادي ومكايهمو الأضرار لي كيسببها للآخرين.
حتى البنات شحال هذا كان خاصك دير بحث معمق باش تلقا وحدة كتخصر الهضرة حاليا ولاو الأغلبية الهضرة الطايحة عندهوم حاجة أساسية فالقاموس ديالهم، وحتى قبل كانت الكلمات النابية متعلقة بواحد الطبقة من الشعب ولكن الآن ولا كلشي كيخصر الهضرة …
واش ضاروري تخصر الهضرة من أجل الهضرة أو باش توصل فكرة أو باش تبان واعر…؟؟؟
